Monday, 14 June 2021 13:29

A Xunta salienta a automatización, a dixitalización e a sostibilidade como factores clave para impulsar a Industria 4.0 en Galicia

O director do Instituto Galego de Promoción Económica (Igape), Fernando Guldrís, participou hoxe en Barcelona na inauguración da quinta edición de Advanced Factories. Destacou a aposta do Goberno galego pola transformación dixital do tecido produtivo, por avanzar no desenvolvemento dos sectores económicos emerxentes e por fomentar unha economía verde e circular.

Barcelona, 8 de xuño de 2021.- O director do Instituto Galego de Promoción Económica (Igape), Fernando Guldrís, participou hoxe en Barcelona na inauguración dunha nova edición de Advanced Factories, consolidado como o maior foro sobre automatización, robótica e Industria 4.0 en España. No acto, no que Galicia acudiu como rexión invitada, puxo de manifesto o traballo que está a impulsar a Xunta para promover a transformación e modernización do tecido produtivo galego.

Coa reactivación da economía como reto principal, Guldrís salientou que tanto a automatización como a dixitalización e a sostibilidade son aspectos que constitúen os factores clave para impulsar o sector industrial e garantir unha recuperación sólida. "No contexto económico e social actual é máis necesario que nunca promover a transformación dixital do tecido produtivo, avanzar no desenvolvemento dos sectores económicos emerxentes e impulsar a economía verde e circular", asegurou.

Un escenario no que, precisamente, afonda esta quinta edición da Advanced Factories , que suma máis de 200 firmas expositoras e ao redor de 260 expertos, co obxectivo de poñer en valor a automatización industrial como ferramenta para aumentar a competitividade e anticiparse ás novas necesidades do sector.

Así, o director do Igape salientou que nos últimos anos, tras a activación da Industria 4.0, a Comunidade logrou grandes avances co impulso de diferentes proxectos individuais de conectividade interempresarial; fomentando a creación de fábricas intelixentes en industrias tan punteiras como Stellantis, Finsa, Televes, Pescanova ou Cupa; e coa activación do emprendemento innovador a través das .

Neste marco, resaltou tamén a creación da Estratexia do Polo Aeroespacial de Galicia, unha iniciativa pioneira a través de Compra Pública Innovadora que está a permitir que a comunidade sexa líder en I+D+i en materia de vehículos aéreos non tripulados.

Fernando Guldrís asegurou que a Xunta seguirá avanzando co obxectivo de facer que a industria galega sexa máis innovadora, forte e adaptada ás demandas actuais, e puxo en valor as oportunidades que agora xorden no contexto dos fondos europeos Next Generation, que permitirán acometer proxectos transformadores no modelo produtivo.

TPL_SV_XUNTA_SOCIAL_SHARE_THIS_ITEM

Login to post comments